បន្ទាយមានជ័យ៖ អភិបាលខេត្ត និងជាប្រធានគណៈកម្មាធិការគណបក្សប្រជាជនកម្ពុជាខេត្តបន្ទាយមានជ័យ លោក អ៊ុំ រាត្រី បានណែនាំដល់សមាជិកក្រុមការងារគណបក្សប្រជាជន ឲ្យពង្រឹងកសាងសមាជិកបក្សនៅមូលដ្ឋានឲ្យបានរឹងមាំ ក៏ដូចជាដោះស្រាយរាល់បញ្ហាប្រឈមរបស់ពលរដ្ឋកុំឲ្យនៅសេសសល់ និងដេីម្បីទទួលបានការគាំទ្រពីប្រជាពលរដ្ឋនៅថ្ងៃបោះឆ្នោតនៅពេលខាងមុខ។

ក្នុងពិធីសំណេះសំណាល និងពិនិត្យឆ្លងរបាយការណ៍ ក្រុមការងារគណបក្សប្រជាជនកម្ពុជា នៅមូលដ្ឋាន នៅថ្ងៃទី១៦ ខែតុលា ឆ្នាំ២០២១ នៅសាលប្រជុំទីស្នាក់ការគណបក្សប្រជាជនខេត្តបន្ទាយមានជ័យ លោក អ៊ុំ រាត្រី មានប្រសាសន៍ថា ដេីម្បីកាន់តែទទួលបានជ័យជម្នះនៅក្នុងថ្ងៃបោះឆ្នោតនាពេលខាងមុខ សមាជិកសមាជិកាត្រូវមានទំនាក់ទំនង ផ្តល់ភាពកក់ក្តៅជូនពលរដ្ឋនៅមូលដ្ឋានឲ្យបានល្អ ដោយត្រូវចុះជាប់ជាប្រចាំតាមមូលដ្ឋានរបស់ខ្លួនឲ្យដឹងពីសុខទុករបស់ពួកគាត់ ដេីម្បីក្រុមការងារចុះដោះស្រាយឲ្យបានទាន់ពេលវេលា នៅពេលពលរដ្ឋជួបការលំបាក។

លោក អ៊ុំ រាត្រី បានលេីកឡេីងថា ក្នុងអាណត្តិដឹកនាំរបស់គណបក្សប្រជាជនកម្ពុជា ជាង ៤០ឆ្នាំមកនេះ គណបក្សប្រជាជនកម្ពុជា មិនដែលមានប្រវត្តិរត់ចោលពលរដ្ឋម្តងណាឡេីយ ផ្ទុយទៅវិញក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជន តែងតែគិតគូរពីសុខទុកពលរដ្ឋជាខ្លាំង រួមសុខរួមទុកជាមួយប្រជាជន ទោះក្នុងកាលៈទេសៈណាក៏ដោយ សម្តេចមិនដែរទុកបងប្អូនពលរដ្ឋចោលឡេីយ ពោលគឺតែងតែចាត់ក្រុមការងារចុះទៅមូលដ្ឋានផ្ទាល់ដេីម្បីដោះស្រាយបញ្ហាដែលពេលជួបប្រទះភ្លាមៗ។ ពិសេសសម្មទិផល ដែលរីកដុះដាលនាពេលបច្ចុប្បន្ននេះ ក៏ដោយសាតែការដឹកនាំរបស់គណបក្សប្រជាជនកម្ពុជា រួមនឹងដោយមានការចូលរួមយ៉ាងផុសផុលពីប្រជាពលរដ្ឋ ដែលតែងតែជឿជាក់លេីការដឹកនាំរបស់សម្តេចប្រធានគណបក្សប្រជាជនកម្ពុជា៕